O pasado venres, a deputada Ana Pontón e o responsábel comarcal do Bng, Serxio Domínguez Louro, daban unha rolda de prensa en Corcubión para tratar, polo miúdo, todo o que está a acaecer coa autovía Costa da Morte.

Ana Pontón destacou que “o informe dos Servizos xurídicos do propio Parlamento recoñece a “ilegalidade” da modificación iniciada polo Goberno galego sobre o contrato, ao que sumou a ausencia dun “informe rigoroso da Xunta” que xustifique que seis millóns de euros eviten a quebra económica da Xunta, “tentan convencernos da súa situación boiante e que estamos saíndo da crise”.

Parécenos “moi grave” pagar tres veces máis do custe dunha autovía na que a Xunta non está a defender o interese xeral que sería “dotar de infraestruturas modernas a Costa da Morte para favorecer o seu desenvolvemento e non ao ditado dunha construtora “ que ademais parte aparece na trama Gürttel.

A deputada reclamou “a copia integra do expediente” e preguntou que ten que ocultar o Partido popular para que o BNG non poida acceder a esa documentación. Si nos vai dicir que vaiamos á Xunta para consultar expedientes parciais, dixo, “non nos vale”, porque temos dereito a copia íntegra dos expedientes.

A Xunta recoñece que permitíu a paralización das obras.

O director Xeral da Axencia galega de Infraestruturas, Francisco Menendez comprometeuse a remitir os expedientes e defendeu á xestión da Xunta alegando que non se produciu ningún incumprimento nos prazos da execución obras porque a Xunta autorizou a paralización das obras, polo tanto, non hai penalidades neste contrato. “Non é posible rescindir o contrato e executar a autovía porque implicaría o pagamento dunha responsabilidade patrimonial de 40 millóns de euros” cantidade investida ata este momento.

A deputada do BNG afirma que este dato é “moi relevante” porque pon de manifesto que a Xunta “ocultou esta paralización durante os últimos meses” e preguntou en que momentos se produciu esta suspensión.

Pontón lembrou que o BNG denunciou a ilegalidade de contratos que agora son investigados pola Xustiza na Operación Zeta mentres a Xunta o negaba o que nos leva a pensar que o Partido popular “carece de credibilidade” tamén neste asunto. Hai unha evidencia, afirmou, a Xunta non aplicou as penalidades incluídas no contrato coa concesionaria da Costa da Morte e neste caso o PP e a Xunta “incumpren de maneira flagrante o seu compromiso cos veciños e veciñas da Costa da Morte”.

Pola súa parte, o responsábel comarcal anunciou a presentación de mocións en todos os concellos para tratar que a Xunta deixe de enganar aos habitantes da Costa da Morte con falsas promesas, e que retome a idea inicial que saiu da catástrofe do Prestige, a de vertebrar a bisbarra cunha vía de comunicación que unira Fisterra coa Coruña.

Evidentemente, isto deixa as claras que a autovía até Baio é insuficiente, o imprescindíbel é, como mínimo, chegar con ela até Berdoias e unir esta con Cee con un corredor, sen esquecer a bifurcación pendente ao porto de Brens, imprescindíbel para o desenrolo industrial e mercantil da comarca.

Cee, a 22 de Decembro de 2014

Serxio Domínguez Louro