Costa da Morte, 2 de abril de 2025. O BNG da Costa da Morte, a través do deputado Oscar Insua, denunciou hoxe no Parlamento galego que a Xunta agarda a que haxa unha desgraza para mellorar a seguridade viaria na estrada AC-445 ao seu paso polo lugar de Estorde, no termo municipal de Cee. 

Nunha interpelación ao Director da Axencia Galega de Infraestruturas (AXI), Francisco Menéndez, na Comisión 2ª, Ordenación Territorial, Obras Públicas, Medio Ambiente e Servizos, o parlamentario nacionalista urxiu ao Goberno galego a  instalar no lugar sinais de redución da velocidade, ademais de pasos de peóns, ao que Menéndez respondeu que “é máis seguro non poñelos a que existan”, escudándose en criterios técnicos. 

Na quenda de réplica, Oscar Insua afeou as palabras de Menéndez e manifestou que é unha cuestión de seguridade. “Dígalle vostede á familia da persoa morta hai dous anos en Anchoa, pois agardaron a que morrera alguén para logo pór pasos de peóns; por que non os puxeron antes?”, afirmou o deputado do BNG, que insistiu: “cantos atropelos ten que haber para que a Xunta poña pasos de peóns en Estorde?”.

O representante nacionalista indicou que o Goberno galego gastou 40 millóns de euros para mellorar o camiño para os peregrinos. “Parece que os tratan mellor a eles que aos propios veciños.  É lamentable que a Xunta se escude sempre nos técnicos; noutros sitios non hai tanto problema para poñer uns pasos de peóns”.

Pola súa banda, o voceiro municipal do BNG de Cee, Serxio Domínguez, criticou as declaracións do director da AXI respecto á falta de necesidade de poñer pasos de peóns en Estorde. “Non teñen sentido as declaracións deste responsable de infraestruturas da Xunta; os problemas de tráfico concéntranse na época do verán, con moita xente cruzando a estrada para ir á praia ou a negocios de hostalaría que hai no lugar”, indica Domínguez, que subliñou que “no seu día xa existiron pasos de peóns en Estorde, e non aumentou por iso a sinistralidade; trátase dunha pequena recta, e non debería ser un problema colocalos e sinalizalos axeitadamente”.

O BNG sinalou que o ano pasado, na mesma estrada AC-445 á altura do lugar da Anchoa, no municipio de Fisterra, a Xunta aprobou a instalacións de tres pasos de peóns, ademais da redución da velocidade a 50 Km/hora, logo de numerosas peticións, concentracións e mobilizacións, e despois do atropelo mortal dunha persoa.